झुंजार सेनापती l मुंबई : वांद्रे पूर्व येथील म्हाडाच्या गृहनिर्माण भवन मुख्यालयात उंदरांचा प्रचंड उच्छाद वाढला असून कर्मचारी हैराण झाले आहेत. इमारतीतील महत्त्वाच्या फाइल्स व कागदपत्रांची उंदरांकडून नासधूस होण्याची भीती व्यक्त होत आहे. उंदरांनी विजेच्या तारा कुरतडल्याच्या घटनांमुळे सुरक्षेची चिंताही वाढली आहे.
गृहनिर्माण भवनमध्ये मुंबई मंडळ, कोकण मंडळ, मुंबई इमारत दुरुस्ती व पुनर्रचना मंडळ, तसेच मुंबई झोपडपट्टी सुधार मंडळाची कार्यालये आहेत. या इमारतीत सकाळच्या वेळी उंदरांच्या विष्ठेमुळे दुर्गंधी पसरलेली असते, तर सायंकाळी गर्दी कमी होताच उंदरांचा मुक्त संचार दिसून येतो. उशिरापर्यंत काम करणाऱ्या कर्मचाऱ्यांना याचा विशेष त्रास सहन करावा लागत आहे. फाइल्स सुरक्षित ठेवण्यासाठी कोट्यवधी रुपये खर्चून बसवलेले कॉम्पॅक्टरही उंदरांपासून सुरक्षित नसल्याची तक्रार आहे.
उंदरांचा बंदोबस्त करण्यासाठी म्हाडाच्या पीपीडी विभागाने कार्यालयात ठिकठिकाणी सापळे लावले असून काही ठिकाणी सिलिंग बंद करण्यात आले आहे. आणखी सापळे आणि रॅट ग्लू पॅड खरेदीसाठी निविदा काढण्यात आली आहे.