⬤ झुंजार सेनापती l मुंबई
मुंबईत तीस ते चाळीस वर्षे पोलीस दलासाठी आयुष्य झोकून सेवा करणाऱ्या पोलीस कर्मचाऱ्यांना मुंबईत हक्काचं घर मिळवून देण्यासाठी आम्ही कटिबद्ध आहोत, असा निर्धार शिवसेना नेते आदित्य ठाकरे यांनी व्यक्त केला.
पोलीस कर्मचाऱ्यांच्या घरांचा प्रश्न मार्गी लागावा यासाठी शिवसेना भवन येथे पोलीस पत्नींची विशेष बैठक आयोजित करण्यात आली होती. या बैठकीस आदित्य ठाकरे प्रमुख उपस्थित होते. बैठकीत पुनर्विकासासंदर्भात सविस्तर चर्चा करण्यात आली.
मुंबईची सेवा आणि संरक्षण करणाऱ्या सेवानिवृत्त पोलीस कर्मचाऱ्यांना मुंबईतच हक्काची घरे मिळावीत यासाठी आम्ही महाविकास आघाडी सरकारच्या काळापासून सातत्याने प्रयत्न करत आहोत. जसे बीडीडी चाळी आणि तेथे राहणाऱ्या पोलीस कर्मचाऱ्यांचे स्वप्न पूर्ण करण्यात आले, तसेच हे स्वप्नही निश्चित साकार करू, असे आश्वासन आदित्य ठाकरे यांनी दिले.