“खुमखुमी असेल तर ठाणे-कल्याणमध्ये येऊन लढा!”

झुंजार सेनापती l अंबरनाथ : वनमंत्री गणेश नाईक यांनी खुमखुमी असेल तर ठाणे किंवा कल्याणमध्ये येऊन माझ्याविरोधात निवडणूक लढवून दाखवावे, त्यांना त्यांची जागा कळेल, असे थेट आव्हान खासदार श्रीकांत शिंदे यांनी दिले. शिवमंदिरात दर्शन घेतल्यानंतर पत्रकारांशी बोलताना त्यांनी नाईक यांच्यावर जोरदार टीका केली.
उपमुख्यमंत्री एकनाथ शिंदे आणि खासदार श्रीकांत शिंदे यांना “माजी” करून टाकू, असे विधान नाईक यांनी केले होते. त्याला प्रत्युत्तर देताना शिंदे म्हणाले की, आम्ही लोकांच्या प्रेमावर निवडून आलो आहोत. आजपर्यंत आम्ही कधीही माजी आमदार किंवा माजी खासदार झालेलो नाही.
आमच्यावर टीका करणाऱ्यांनी आधी स्वतःच्या घरात डोकावावे. आरोप करणाऱ्यांच्या घरातील तीन सदस्य आधीच ‘माजी’ झाले आहेत, याचा त्यांना विसर पडत चालला आहे, असा टोला देखील त्यांनी लगावला.