झुंजार सेनापती lबीड : तांदळवाडी घाट येथील भीषण पाणीटंचाई आणि विशेष ग्रामसभेतील कथित अनागोंदीवरून ग्रामपंचायतीच्या कारभारावर प्रश्नचिन्ह उपस्थित झाले आहे. ग्रामसभेत प्रश्न विचारल्यावर सरपंचांनी अपमानास्पद उत्तर दिल्याचा आरोप करत एका जागरूक नागरिक आणि पत्रकाराने थेट माहिती अधिकाराचे हत्यार उपसले आहे.
विद्यमान सरपंच, उपसरपंच आणि ग्रामसेवक यांच्या चार वर्षांच्या कार्यकाळातील ग्रामसभांचे इतिवृत्त, विकासकामे, शासकीय निधीची बिले आणि लेखापरीक्षण अहवालांची माहिती मिळविण्यासाठी गटविकास अधिकारी, पंचायत समिती बीड यांच्याकडे अर्ज दाखल करण्यात आला आहे.
विशेष ग्रामसभेपूर्वी कोऱ्या कार्यवृत्त नोंदवहीवर सह्या घेतल्याचा तसेच महत्त्वाच्या सभेला उपसरपंच आणि ग्रामसेवक अनुपस्थित असल्याचा आरोपही करण्यात आला आहे.
“मतदान केले नाही म्हणून नागरिकांच्या प्रश्नांना उत्तर द्यायचे नाही का?” असा सवाल उपस्थित करत संबंधित पत्रकाराने आपल्या सुरक्षिततेच्या चिंतेबाबत पोलीस अधीक्षक, बीड यांनाही लेखी निवेदन दिल्याचे सांगितले.
आता माहिती अधिकारातून कोणती कागदपत्रे समोर येतात, ग्रामपंचायतीच्या कारभाराचे वास्तव काय आहे आणि गावाच्या विकासासाठी आलेल्या निधीचा विनियोग कसा झाला, याकडे तांदळवाडी घाट ग्रामस्थांचे लक्ष लागले आहे.
तांदळवाडी घाटच्या ग्रामपंचायतीचा हिशेब उघडणार!
माहिती अधिकारातून विकासकामे, निधीची माहिती मागवली
