झुंजार सेनापती | प्रतिनिधी
महाराष्ट्र व कर्नाटकातील लाखो भाविकांचे श्रद्धास्थान असलेल्या श्रीक्षेत्र आदमापूर येथील सद्गुरु बाळूमामा मंदिर ३ मार्च ते ६ मार्चदरम्यान दर्शनासाठी पूर्णतः बंद राहणार आहे, अशी माहिती देवस्थान समितीने दिली.
७ मार्चपासून सुरू होणाऱ्या वार्षिक भंडारा उत्सवाच्या पूर्वतयारीसाठी हा निर्णय घेण्यात आला आहे. उत्सवाच्या पार्श्वभूमीवर मंदिर परिसरात मोठ्या प्रमाणावर भाविकांची गर्दी होत असल्याने परिसराचे पावित्र्य राखणे व व्यापक स्वच्छता करणे आवश्यक आहे.
या चार दिवसांत मुख्य मंदिर व गाभारा, अन्नछत्र, भक्तनिवास तसेच देणगी विभाग आदी ठिकाणी स्वच्छता आणि दुरुस्तीची कामे हाती घेतली जाणार आहेत. सर्व व्यवस्था सुरळीत करण्यासाठी विशेष मोहीम राबविण्यात येणार आहे.
स्वच्छता व तयारीची कामे पूर्ण झाल्यानंतर ७ मार्चपासून भंडारा उत्सवाला दिमाखात सुरुवात होईल आणि त्याच दिवशी मंदिर भाविकांसाठी पुन्हा खुले करण्यात येईल. ३ ते ६ मार्चदरम्यान भाविकांनी मंदिरात येणे टाळावे, असे आवाहन देवस्थान समितीने केले आहे.
भंडारा उत्सवासाठी ‘बाळूमामा’ मंदिर ३ ते ६ मार्चला बंद
