झुंजार सेनापती l पुणे
पिंपरी-चिंचवड शहरातील काळभोर नगर परिसरात आज दुपारी एक खळबळजनक घटना उघडकीस आली. लहान बाळ चोरण्याच्या तयारीत असलेल्या एका संशयित महिलेला सतर्क नागरिकांनी रंगेहात पकडले. संतप्त जमावाने तिला चोप देत अखेर पिंपरी पोलिसांच्या ताब्यात दिले.
मिळालेल्या माहितीनुसार, संबंधित महिला बराच वेळ परिसरात संशयास्पद हालचाली करत होती. तिने एका लहान मुलाला जवळ बोलावून पळवून नेण्याचा प्रयत्न केला. मात्र मुलाने आरडाओरडा केल्याने नागरिकांचे लक्ष वेधले गेले आणि तात्काळ हस्तक्षेप करत महिलेला पकडण्यात आले.
नागरिकांनी तिची झडती घेतली असता बॅगमध्ये चाकू, मुंगी मारण्याचे औषध आणि गुंगी आणणारा स्प्रे आढळून आला. या घटनेमुळे परिसरात भीतीचे वातावरण निर्माण झाले असून पालकांमध्ये मोठी चिंता व्यक्त होत आहे.
दरम्यान, पिंपरी पोलिसांनी संशयित महिलेला ताब्यात घेतले असून तिची सखोल चौकशी सुरू आहे. या प्रकरणामागे एखादी मोठी टोळी कार्यरत आहे का, याचाही तपास पोलिसांकडून करण्यात येत आहे. नागरिकांनीही सतर्क राहून अशा संशयास्पद हालचाली दिसल्यास तात्काळ पोलिसांना कळवावे, असे आवाहन करण्यात आले आहे.